Lionel Messi stavio je tačku na veličanstvenu reprezentativnu karijeru onako kako je navikao navijače Argentine – kao centralna figura pobjede. „Gaučosi“ su u Buenos Airesu savladali Benin 3:0, a 39-godišnji kapiten učestvovao je kod sva tri gola.
Poslije prvog poluvremena bez pogodaka, Messi je u nastavku najprije asistirao Nikolasu Otamendiju za vođstvo, a potom i Niku Pazu za 2:0. Tačku na emotivnu noć stavio je sam Messi, realizovavši penal za konačnih 3:0.
Bio je to njegov 126. pogodak u dresu Argentine. Pred više od 85.000 gledalaca na Monumentalu oprostio se kao rekorder nacionalnog tima po broju nastupa i golova, nakon više od dvije decenije u reprezentaciji.
Veče je bilo posvećeno njegovom nasljeđu – od tribina i koreografija do oproštajnog programa nakon posljednjeg zvižduka. Sa reprezentacijom je, između ostalog, osvojio Svjetsko prvenstvo i Kopa Ameriku.
Foto: AFA
